煲劇後遺症

天陰風大.21C

終於用咗三晚(每晚只能睇一、兩個鐘,因為會畀阿媽鬧話唔瞓覺)、兩個lunch time同兩朝早(即出門前一個鐘左右)嘅時間(但其實有兩、三集係响三色台樹睇嘅)將《大話妹》(原名為My Girl.哎呀,點解official site無英文??好啦,去哩個啦!)煲完了!好唔捨得呀~套劇有幾好睇?我唔寫啦.因為我肯定唔夠啲die hard fans瘋狂,亦無咁嘅功力同熱情去寫究竟我幾鍾意套劇,所以有興趣嘅話,可以去啲論壇上面睇啦.不過,我想second阿柯蓮娜姐嘅推介:呢套劇嘅音樂真係做得好好!襯住套劇聽又得,分開不停煲又得!而且,人哋幾有心機呀,同一首歌可以做幾個唔同嘅mixing嚟襯翻場戲.有時可以唔同到以為係另一首歌!港劇大概無辦法做到咁嘅水準啩?雖則我當年都買過《妙手人心》嘅原聲大碟...但算罷啦,咁好嘅音樂配落家陣三色台啲所謂嘅小生花旦同爛gag劇本到,盞浪費咗啲正歌囉(更姑勿論隔籬二奶台啦).

查實,我已經好耐無煲劇,因為煲劇會導致嚴重嘅後遺症!!!

煲劇時我嘅症狀有:唔夠瞓、睇睇下自己响到爆笑或喪喊、返工時心神恍惚做做下嘢會响到傻笑、集中唔到精神時時刻刻會掛住套劇恨不得可以馬上睇完、腦裏面不停响到自動重溫精華片段同埋玩跳線CD機(依家响到播緊啦.再嚴重啲會控制唔到係咁哼埋出嚟o添)、周圍揾睇過嘅人討論劇情、不停地向未睇嘅人推薦、如果係响電腦上睇嘅話仲會不停咁cap screen(然後幻想自己個樣貼咗响鍾意嘅嗰個男主角旁邊)...

嗱,俾兩張好s-weet s-weet嘅screen shot你哋望下啦:



好嚴重???

未算.

睇完之後會不停翻睇心愛/攪笑/感人/溫馨/重要/型仔片段.如果原本是問人借嚟睇嘅話,仲會買翻正版VCD或DVD.如果有soundtrack就會不停地煲.一有機會就會上網「巢」forum啲討論睇啲主角嘅最新動向.但最最最最最嚴重的莫過於中咗男主角嘅毒!!!(咁,我係女仔嚟o架嘛,中男主角毒查實好正常啫.不過都係唔好畀同事們知道,否則會畀人笑我有室女病!)

今次個男主角叫李東旭(仲有:1,2,3).雖然唔能夠話完全係我杯茶（佢細過我!>_<~~~),但真係好得囉!!!超鍾意佢把聲,夠厚但又唔會粗聲粗氣.就係佢令我覺得原來韓文係可以好好聽!攪到我同Sandee依家好認真咁考慮緊係咪去學韓文!!當佢同Yoo Rin sshi講"sarang hae"時,我簡直溶咗...我唔寫咁多啦,怕羞嘛. :P

熱切期待佢下部新戲Strongest Romance!