失眠夜之鬼拍後尾枕

頂.點解會失眠o架?!我真係好想瞓嘅噃!

終於有一晚可以早啲啲瞓,竟然會瞓唔著... 真係激死我啦.於是聽收音機,竟然播好多好多年前我日夜不停煲嘅Deeper and Deeper.

無理由係因為今晚食過嘅嘢或者係因為太富娛樂性o架,而且,我頭先其實係一邊寫一邊嗑眼瞓嘅噃.啊,可能係因為個冷氣不停咁吹住我.但...又唔係第一晚開冷氣.咁... ...

即係有嘢掛住掛住,未解決啦?

呃,未解決嘅問題太多啦,一晚瞓唔著又可以解決到咩呢?唔好講人生裡面嗰啲好複雜嘅問題,就係雞毛蒜皮嘅都一堆:

• 重有好多日嘅副刊未睇.已經想放棄.
• 唔知重有五餅定六餅錄影帶未清.係啦,應該要去買部HDD recorder同機頂盒呀呵?呃.
• 堆咗N世嘅雜誌呀,剪報呀...要點執呢??
• 之前嗰啲blog entries呀,遊記呀,食記呀...唉,不如唔好寫算嘞.
• 我發覺考完試重無動力過考試前.哩排只係不停咁食.食.食!
• 我依家suffer緊post-carefree-shopping綜合症.我懺悔:我係唔應該係咁買嘢法嘅.
• 呃,究竟要著咩返工先唔會咁娘?我覺得我著得好老土呀~~~
• 咦,做咩係咁跌o架?我啲投資不停潛緊水囉!!!
• 好耐無唱K.突然間想整個金曲懷舊夜o添.
• 我要減肥.我真係要減肥.我好認真地覺得我要減肥.起碼要減20磅囉.
• 哎呀,又要plan旅行啲嘢.好煩呀.好貴呀.點解歐羅咁貴o架?不如我地今年唔好去歐洲啦?好唔好?
• 唉,今年又係唔合格o架嘞.點解又唔合格呢... 唉,我真係好想快快脆搞掂佢囉.
• 點樣可以揾多啲錢呢?我想買樓囉.就算唔係買個大啲嘅單位,我都想買個細嘅嚟放租囉.但無錢.我要錢!!!
• 點樣可以唔好再咁頹呢?真係要好好打算究竟要响而家哩到慢慢爬,抑或出去轉個圈.就算唔係轉行,換間公司,有啲新嘅衝擊,係唔係會令自己無咁頹呢?但...咁又可以維持幾耐呢?
• 其實我老細覺得我係唔係可有可無嘅呢?我覺得我係囉.我已經將我過去3年每個月會做嘅tasks有一半畀咗阿o靚仔,而我要去接啲我都唔中意兼唔識嘅嘢.咁即係想點呢?
• 係唔係真係要去考慮相睇呢?講真,我又唔覺得我適合結婚,甚至唔適合同人相處.我發覺...其實我係一個唔識愛人嘅人.但係阿爸阿媽好煩囉.雖然唔係成日掛响口,但連阿爸間唔時都會話,你幾時帶個人返嚟嘅時候,而阿媽又會响到講表妹個BB講到如果你生我一定買好多衫俾你個BB嘅時候,我覺得,問題其實已經好嚴重.
• 究竟我有咩朋友呢?我覺得其實我無好close嘅朋友囉.我好想同佢地做好朋友嘅,唔知點解,變變吓唔知閃咗去邊?又一直我以為好close嘅,其實我又有幾認識佢呢?
• 點解我咁不安嘅?怪唔之得,嗰晚我會夢見我變咗地中海.
• 抑或係...我嚴重缺乏自信?唉...我會唔會變隱閉青年o架?(重係唔係青年???)

係啦,瞓唔到就會好似發癲咁.你重睇緊?你都係唔好睇得咁認真啦.

就當係啲飲大咗嘅人,醉咗响樹發o翕瘋好啦.